21:58
ངོ་མཚར་ཆེ་བའི་ཁྱེད་ཀྱི་ལུས་པོ།
ལེའུ་དང་པོ། ཁྱེད་ཀྱི་ལུས་པོ་གང་ཞིག་གིས་གྲུབ་པ་ཡིན་ནམ།
མི་ཚོས་ཁྱེད་ནི་རང་གིས་ཟས་གང་ཞིག་བཟས་པ་དེ་རེད་ཅེས་བརྗོད་ཀྱི་ཡོད། འོན་ཀྱང་ཁྱེད་ཀྱིས་རྩ་རྫས་རེའུ་མིག་གང་ཚང་གི་ཕྱེད་ཙམ་བཟོས་པ་དྲན་གྱི་འདུག་གམ།
མི་ཚོས་ཁྱེད་ནི་རང་གིས་ཟས་གང་ཞིག་བཟས་པ་དེ་རེད་ཅེས་བརྗོད་ཀྱི་ཡོད། འོན་ཀྱང་ཁྱེད་ཀྱིས་རྩ་རྫས་རེའུ་མིག་གང་ཚང་གི་ཕྱེད་ཙམ་བཟོས་པ་དྲན་གྱི་འདུག་གམ། ད་དུང་མི་ཚོས་ཁྱེད་ཀྱི་ལུས་པོ་བརྒྱ་ཆ་ ༦༠ ཙམ་ཆུ་རེད་ཅེས་ཀྱང་བཤད་ཀྱི་ཡོད། ཆུ་དེ་དག་གང་ཞིག་ནས་ཡོད་པ་ཡིན་ནམ། ལྷག་ལུས་ཀྱི་བརྒྱ་ཆ་༤༠ དེས་གང་ཞིག་གྲུབ་བམ།
ཁྱེད་ཀྱི་ལུས་པོ་ཨ་སྒོར་ས་ཡ་མང་པོའི་རིན་ཐང་ལྡན་ཡོད་པའི་ཚོར་སྣང་བྱུང་མྱོང་ངམ། གལ་ཏེ་ང་ཚོས་ཁྱེད་ལ་རང་གི་ལུས་པོ་གྲུབ་བྱེད་ཀྱི་རྩ་རྫས་ཚང་མ་བསྡོམས་ནས་ཨ་སྒོར་༡༦༠ ཙམ་གྱི་མ་གནས་ལས་མེད་པར་བཤད་ཚེ་ཁྱེད་རང་ཧང་སང་དགོས་དོན་མེད་དེ། ཁྱེད་རང་མང་ཆེ་བ་འཚོ་རླུང་གིས་གྲུབ་པ་ཡིན་པའི་ཕྱིར། བདེན་པ་རེད། ལུས་པོ་ཚང་མ་གཅིག་པ་མ་རེད། རིང་པོ། ཐུང་ཐུང་། རྒས་པོ། གཞོན་གཞོན། ཐང་པོ་དང་དེ་ཙམ་ཐང་པོ་མེད་པ་སོགས་ཡོད་རེད། འོན་ཀྱང་ང་ཚོ་ནི་རྙོག་འཛིང་ཆེ་བའི་བྱ་བར་འཇུག་པའི་འདུས་རྡུལ་ཚོམ་བུ་མང་པོས་གྲུབ་པ་རེད། ཡང་ན་ང་ཚོ་དེ་ལས་ལྷག་པ་ཞིག་རེད་ཡོད་དམ། དེའི་ལན་ནི་རང་གིས་དྲི་བ་དེ་སུ་ཞིག་ལ་འདྲི་མིན་ལ་རག་ལས་པ་ཡིན།
སྐྱེ་ངོས་ཚན་རིག་པ་ཞིག་གིས་ཁྱེད་རང་ཕྲ་ཕུང་ཕྲག་ཁྲིག་བརྒྱ་ཕྲག་མང་པོས་གྲུབ་པ་རེད་ཅེས་ལན་བཏབ་ངེས་རེད། ཕྲ་ཕུང་དེ་དག་ནི་མུ་མཐུད་ནས་སྐྱེད་སྤེལ་བྱུང་བ་དང་། ཤི་བ། གསར་རྙིང་རྗེ་སྤོ་བྱེད་ཀྱི་ཡོད། ཁྱེད་ཀྱི་ལུས་པོའི་གྲུབ་ཆའི་ཆུ་མང་ཆེ་བ་དེ་དག་གི་ནང་ལ་ཡོད། ཕྲ་ཕུང་དེ་དག་གི་བརྒྱ་ཆ་ཕྱེད་ལས་མང་བ་ཁྱེད་ལ་དབང་གི་མེད། དེ་དག་ཕྲ་སྲིན་ཕྲ་ཕུང་རེད། ཕྲ་སྲིན་གྱི་ཉེ་རིགས་མང་པོ་དང་སྐྱེ་དངོས་ཕྲ་མོ་གཞན་མང་པོ་ཞིག་ཁྱེད་ཀྱི་ལུས་ཀྱི་ཕྱི་ནང་གཉིས་ཆར་གནས་སྡོད་བྱེད་ཀྱི་ཡོད། བསྡོམས་ནས་བཤད་ན་དེ་ཚོ་ཕལ་ཆེར་ཀི་ལོ་༢ ཡས་མས་ཡོད་རེད། སྒུག་ཨ། རང་ད་དུང་ལག་པ་བཀྲུ་བར་བྲེལ་བ་མ་བྱེད་ཨ། ཕྲ་སྲིན་ཚང་མ་གནོད་འཚེ་ཅན་མ་རེད། དངོས་གནས་བྱས་ན་ལུས་སྟེང་གི་སྐྱེ་དངོས་ཕྲ་མོ་མང་པོས་ཁྱེད་ཀྱི་ནད་འགོག་མ་ལག་ཡར་རྒྱས་གཏོང་གི་ཡོད་ལ་ལུས་ནང་གི་ཕྲ་སྲིན་དག་ཟས་འཇུ་བར་གལ་ཆེན་པོ་ཆགས་ཀྱི་ཡོད།
ཕྱོགས་གཞན་ནས་བཤད་ན་ཁྱེད་རང་གྲུབ་བྱེད་ཀྱི་མ་ལག་ཚང་མ་ཁྱེད་ཀྱི་ལུས་སྟེང་གི་མིའི་ཕྲ་ཕུང་ཚང་མས་གྲུབ་པ་ཡིན། ཁྱེད་ཀྱིས་དཀའ་ལས་རྒྱབ་ནས་བཟོས་པའི་རྒྱུས་པ་དག་དང་། ཁྱེད་ཀྱིས་རྟག་ཏུ་མེད་ན་འདོད་པའི་ཚིལ་ལུ། ཁྱེད་ཀྱི་རུས་པ། ཁྱེད་ཀྱི་སོ། ཁྱེད་ཀྱི་ཀླད་པ་དང་། ད་དུང་ཁྲག་དང་གཅིན་པ་ཚུད་པའི་ཁྱེད་ཀྱི་ལུས་སྟེང་གི་རླན་གཤེར་ཚང་མ་ཕྲ་ཕུང་གིས་གྲུབ་པ་རེད།
འོན་ཏེ་ཁྱེད་ཀྱིས་དྲི་བ་དེ་རྫས་སྦྱོར་རིག་པ་བ་ཞིག་ལ་འདྲི་ཚེ། རང་ལ་ལན་སོ་སོ་ཞིག་ཐོབ་རྒྱུ་ངེས་ཅན་རེད། ཁོང་ཚོས་རང་ལ་རྫས་རིགས་གང་དག་གིས་ཁྱེད་རང་གྲུབ་པའི་གྲངས་ཐོ་ཞིག་སྟེར་སྲིད། ཀི་ལོ་༧༠ ཅན་གྱི་མི་ཞིག་ལ་རྡུལ་ཕྲན་གྲངས ༧༠༠༠༠༠༠༠༠༠༠༠༠༠༠༠༠༠༠༠༠༠༠༠༠༠༠༠ འདི་འདྲ་མང་པོ་ཡོད། ངས་རང་ལ་ཀླད་ཀོར་མང་པོ་དེ་དག་རྩི་མི་དགོས་པ་བྱེད་ཆོག དེར་ཀླད་ཀོར་ ༢༧ ཡོད། ཡང་ན་ཁྱེད་ཀྱིས་འདི་ལྟར་ལྡབ་གསུམ་ཅན་གྱི་ཐེར་འབུམ་བདུན་ཡོད་ཅེས་ལབ་ནའང་འགྲིག དེ་ནི་རྡུལ་ཕྲན་གྱི་གྲངས་འབོར་མང་པོ་རེད། ཁྱེད་ཀྱི་ལུས་པོར་མ་མཐའ་ཡང་རྩ་རྫས་རིགས་མི་འདྲ་བ་ ༦༠ ཙམ་ཡོད། ལུས་ཀྱི་ཆ་ཕལ་ཆེ་བ་ཡང་རླུང་དང་འཚོ་རླུང་རྩ་རྫས་འདུས་པའི་གོང་བུ་དེ་ H2O འམ་ཆུ་རེད། དེ་ནས་ནག་རྫས་ཏེ་ཁྱེད་ཀྱི་ལུས་པོའི་སྐྱེ་ལྡན་འདུས་རྫས་དཔེར་ན་ཁར་སྦོ་མངར་བཅུད། ལི་ཚིལ། སྤྲི་དཀར་དང་ཉིང་སྐྱུར་བཅས་ཚང་མ་དེས་གྲུབ་ཡོད། ད་དུང་ཟེ་རླུང་དེ་དེས་ཁྱེད་ཀྱི་ཌི་ཨེན་ཨེ་གྲུབ་པ་ཡིན། ཚེ་སྲོག་ལ་མཁོ་གལ་བའི་རྩ་རྫས་གཞན་མང་པོ་ཡོད་ཀྱང་དེ་དག་གི་གྲངས་འབོར་ཉུང་ཤས་ཙམ་ལས་མེད། ཁྱེད་ཀྱིས་རང་ལ་ལྕགས་རྡུལ་ཉུང་ཤས་ཙམ་སྟེ་གྷ་རམ་ ༤ ཙམ་ལས་མི་དགོས་པར་ཤེས་དུས་ཧ་ལས་སྲིད་ཀྱང་དེ་ནི་ཁྱེད་ཀྱི་ལུས་ཡོངས་སུ་འཚོ་རླུང་ཀི་ལོ་ ༤༠ ཙམ་སྐྱེལ་འདྲེན་བྱེད་པར་འདང་ངེས་ཅན་ཞིག་རེད། རེད་བདེན་པ་རང་། འཚོ་རླུང་ཀི་ལོ་ ༤༠ ཐམ་པ་རེད་དོ། ལུས་ཀྱི་གདོས་ཚད་བརྒྱ་ཆ་༩༩ ཐམ་པ་རྩ་རྫས་གྲངས་ ༦ གིས་གྲུབ་ཡོད། དེའི་ནང་ནས་བརྒྱ་ཆ་ ༦༥ ཐམ་པ་འཚོ་རླུང་རེད། རྡུལ་ཕྲན་ཚང་མའི་བརྒྱ་ཆ་༩༩་༩ ཐམ་པ་ཁོག་སྟོང་ཡིན་དུས། དོན་དངོས་བཤད་ན་ཁྱེད་རང་གང་ཞིག་གིས་ཀྱང་མ་གྲུབ་པ་ཡིན། གལ་ཏེ་ང་ཚོས་གཟུགས་པོའི་ནང་གི་སྟོང་ཆ་དེ་དག་ཚང་མ་མེད་པར་བཏང་ཐུབ་པར་ཆ་གཞག་ཚེ། འགྲོ་བ་མི་རིགས་ཡོད་དོ་ཅོག་ཀ་ར་གྲུ་བཞི་མ་གཅིག་གི་གོ་སར་བསྡུ་ཐུབ།
གལ་ཏེ་ཁྱེད་རང་གིས་སྙན་ངག་གི་ཐོག་ནས་འགྲེལ་འདོད་ཚེ། ཁྱེད་ཀྱིས་རང་སྐར་ཐལ་གྱིས་གྲུབ་ཅེས་བཤད་ན་ཡང་འགྲིག། ཁྱེད་རང་གྲུབ་བྱེད་ཀྱི་རྩ་རྫས་ཚང་མ་གནའ་སྔ་མོ་ཞིག་གི་ཚེ་ན་སྐར་མ་ཞིག་གི་ནང་ལ་བསྲེ་སྦྱོར་བྱུང་ཡོད་ལ། ནམ་ཞིག་སྐར་མ་དེ་དག་ཤི་དུས་ཁྱད་ཕགས་ནོ་ཝར་(སྐར་ཆེན་གས་ཐོར)འགྱུར་བ་དང་། དུ་བ་མཇུག་རིང་གི་རྣམ་པར་འགྱུར་ནས་གོ་ལ་འདིར་ལོ་ངོ་ཐེར་འབུམ་མང་པོའི་སྔོན་ནས་སྦྱོར་བ་རེད། དེ་རྗེས་སྐྱེ་ལྡན་འདུས་རྫས་ཏེ་ང་ཚོའི་འཛམ་གླིང་འདི་སྟེང་གི་སྐྱེ་ལྡན་སྲོག་ཆགས་ཡོངས་ཀྱི་རྩོམ་གཞི་ཨ་མ་དེ་ཆགས་པ་རེད། དངོས་གནས་བཤད་ན་ཁྱེད་རང་གྱི་བརྒྱ་ཆ་ ༩༧ ཐམ་པ་སྐར་མ་དེའི་རྒྱུ་ཆས་གྲུབ་པ་རེད། དེ་དངོས་གནས་བློ་ལ་འཆར་བདེ་པོ་ཞིག་མི་འདུག་གམ།
རྗེས་མ་ཁྱེད་རང་སོ་སོའི་ལུས་ལ་དམིགས་ནས་མ་སྐྱིད་པ་འདྲ་ཆགས་དུས་ཁྱེད་རང་དེ་འདྲའི་ཐག་རིང་ཞིག་ནས་འདིར་སླེབས་ཡོད་པ་ཇི་འདྲའི་ཡ་མཚན་ཆེ་བ་ཞིག་ཡིན་པར་སོམས་དང་། དེ་ཡང་སྐར་མ་ལས་སྐྱེས་ཤིང་། གདོད་མའི་ཕྲ་ཕུང་ཞིག་ནས་རྙོག་འཛིན་ཆེ་བའི་མ་ལག་ཞིག་ཏུ་གྲུབ་པའི་བརྒྱུད་རིམ་དེ་ཚོར་བསམ་དགོས། མ་ལག་དེས་ཇི་ལྟར་བྱ་བ་བྱེད་པའི་ཚུལ་ཤེས་འདོད་དམ། ངོ་མཚར་ཅན་གྱི་ཁྱེད་ཀྱི་ལུས་པོའི་སྐོར་ཤེས་འདོད་ན་ང་ཚོའི་ལེ་ཚན་རྗེས་མ་རྣམས་སུ་གཟིགས་རྒྱུ་མ་བསྙེལ་བ་གནང་རོགས།
ད་དུང་་་་་འོ་རེད་་་རེད། ཅི་སྟེ་ཁྱེད་ཀྱིས་ཤེས་འདོད་ཡོད་ཚེ། དཀྲི་སྐོར་མ་རྒྱབ་པའི་ཁྱེད་ཀྱི་ལུས་པོའི་ཕྲ་ཕུང་ཚང་མའི་ནང་གི་ཌི་ཨེན་ཨེ་ཚང་མ་ས་ཆ་འདི་ནས་སྐར་མ་གཤིན་རྒྱལ་བར་ཕར་བརྐྱངས་ནས་སླར་གོ་ལ་འདི་བར་སྙོབ་ནུས། གང་འདྲ་བྱུང་། ཡ་མཚན་པོ་འདུག་མི་འདུག་གམ
གོང་གི་རྩོམ་བསྒྱུར་འདི་ནི་ངོ་དེབ་ཐོག་འདོན་སྤེལ་བྱེད་བཞིན་པའི་ངོ་མཚར་ཆེ་བའི་ཁྱེད་ཀྱི་ལུས་པོ་ཞེས་པ་དེ་ཡིག་ཐོག་ཏུ་བོད་བསྒྱུར་བྱས་པ་ཞིག་ཡིན། ངོ་དེབ་ཐོག་སྤེལ་བྱས་བའི་བརྙན་ཐུང་དེར་གཟིགས་འདོད་ན་གཤམ་དེར་བཀོད་པའི་ཡོང་ཁུངས་ཞེས་པའི་དྲ་ཐག་དེ་ནས་གཟིགས་ཐུབ།
ཡོང་ཁུངས། ངོ་དེབ། དྲ་ཚིགས།
ཐ་སྙད་འགྲེལ་བརྗོད།
འདུས་རྡུལ། རྡུལ་ཕྲན་གཉིས་དང་གཉིས་ལས་མང་བ་འདུས་ནས་གྲུབ་པའི་རྫས། རང་གར་གནས་སྡོད་བྱེད་པའི་རྫས་ཀྱི་བརྩི་གཞི་ཆུང་མཐའ།ཌི་ཨེན་ཨེ། སྐྱེ་ལྡན་ཕྲ་ཕུང་དང་གཉན་སྲིན་སོགས་ཀྱི་རིགས་རྫས་གནས་ཚུལ་སྐྱེལ་འདྲེན་བྱེད་པའི་ལྟེ་རྡུལ་གྱི་སྐྱུར་རྫས་འདུས་རྡུལ།
རྩ་རྫས། རྫས་སྦྱོར་གྱི་ལམ་ནས་ཆ་ཤས་སོ་སོར་དབྱེ་མི་ཐུབ་པའི་དངོས་གཟུགས།
གདོས་ཚད། དངོས་པོའི་རང་གཤིས་ཤིག བེམ་རྫས་ཇི་ཙམ་ཡོད་པའི་ཚད་དང་འཐེན་ཤུགས་ཀྱི་ར་བའི་ནང་དེའི་ཤུགས་རྐྱེན་ཇི་ཙམ་སྤྲོད་པ།
ཁྱད་ཕགས་ནོ་ཝ། སྐར་མ་ཤིན་ཏུ་ཆེ་བ་དག་མཐར་འཇིག་པའི་གནས་སྐབས་སུ་འོད་འཕྲོ་ཤིན་ཏུ་གསལ་བ་ཕྱིར་འདོན་གྱིས་གས་འཐོར་འགྲོ་བ་ལ་ཟེར།
No comments
Post a Comment