གཅིན་སྙིའི་ན་ཚའི་རྐྱེན་པས་མཁལ་མར་གནོད་སྐྱོན།

གཅིན་སྙིའི་ན་ཚའི་རྐྱེན་པས་མཁལ་མར་གནོད་སྐྱོན།

ཨི་ཌན་བྷག་གི་ཚན་རིག་པ་ཁག་ཅིག་གིས་གཅིན་སྙི་ནད་པ་འགའ་ཞིག་ལ་མཁལ་མའི་ནད་གཞི་དང་འབྲེལ་ཡོད་ཀྱི་སྤྲི་དཀར་གཙོ་ཆེ་ཞིག་ངོས་འཛིན་བྱུང་ཡོད་ཅིང་སྤྲ... 10:40

ཨི་ཌན་བྷག་གི་ཚན་རིག་པ་ཁག་ཅིག་གིས་གཅིན་སྙི་ནད་པ་འགའ་ཞིག་ལ་མཁལ་མའི་ནད་གཞི་དང་འབྲེལ་ཡོད་ཀྱི་སྤྲི་དཀར་གཙོ་ཆེ་ཞིག་ངོས་འཛིན་བྱུང་ཡོད་ཅིང་སྤྲི་དཀར་དེ་བྱི་བ་དང་ཙི་ཙིའི་གཟུགས་ཕུང་ནང་བཀག་སྡོམ་བྱས་པ་བརྒྱུད་གཅིན་སྙི་ན་ཚའི་རྐྱེན་པས་མཁལ་མར་གནོད་སྐྱོན་ཐེབས་རྒྱུར་བཀག་འགོག་བྱེད་ཀྱི་ཡོད་པར་ཤེས་ཤིང་།ཨི༌ཌན༌བྷགྷ༌གཙུག༌ལག༌སློབ༌གཉེར༌ཁང༌གི༌ཚན༌རིག༌པས༌གསར༌རྙེད༌དེས༌གསོ༌ཐབས༌གསར༌པ༌ཞིག༌ལ༌སྣེ༌འཁྲིད༌བྱེད༌སྲིད༌པའི་འགྲེལ་བརྗོད་བྱས་འདུག

གཅིན༌སྙི༌ན༌ཚའི་རྐྱེན་པས་ཁྲག་ནང་གི་མངར་ཆའི་འཕེལ་ཚད་མཐོ་ཞིང་ན་ཚ་འདིས་གོ་ལ་ཁྱོན་ཡོངས་ཀྱི་མི་འབོར་ས་ཡ་༤༡༥ ལྷག་ལ་གནོད་རྐྱེན་བཟོ་བཞིན་པ་དང་། ན་ཚ་འདི་མཁལ་མ་སྐྱོན་ཅན་ཆགས་པའི་རྐྱེན་རྩ་ཞིག་ཏུ་གྱུར་ཡོད་པ་མ་ཟད་དོན་དངོས་སུ་གཅིན་སྙི་ནད་པ་རྒྱ་ཆ་ ༤༠ % ལྷག་ལ་མཁལ་མའི་ན་ཚ་བྱུང་བཞིན་ཡོད།
P2X7R ཞེས་པའི་སྤྲི་དཀར་འདིས་གཉན་ཚད་དང་ནད་འགོག་མ་ལག་ནང་བྱེད་སྒོ་གལ་ཆེན་ཞིག་བཟུང་ཡོད་ཅིང་དེ་སྔོན་སྤྲི་དཀར་འདི་མཁལ་མའི་ན་ཚ་དང་འབྲེལ་ཡོད་པ་མ་གཏོགས་གཅིན་སྙི་ན་ཚ་དང་འབྲེལ་ཡོད་པ་ཤེས་རྟོགས་བྱུང་མེད་ཀྱང་དེང་གི་ཆར་གཅིན་སྙིའི་མཁལ་ནད་(གཅིན་སྙི་ན་ཚའི་རྐྱེན་པས་མཁལ་བར་ནད་སྐྱོན་བྱུང་བ)ཀྱི་རྐྱེན་བྱེད་ཀྱི་ཡོད་པར་ཤེས་རྟོགས་བྱུང་བ་ཐེངས་དང་པོ་ཆགས་ཡོད།

མངོན་གསལ་ཅན་གྱི་མདུན་བསྐྱོད།

ཉམས་ཞིབ་པ་ཚོས་ཤེས་རྟོགས་བྱུང་གསལ་ལྟར་ན་གཅིན་སྙི་ནད་པའི་མཁལ་མའི་ནང་སྤྲི་དཀར་P2X7R འདི་མང་པོ་ཐོན་བཞིན་ཡོད་པ་དང་གཅིན་སྙི་ན་ཚ་མེད་པ་ཚོའི་མཁལ་མའི་ནང་ལ་སྤྲི་དཀར་འདི་མཐོང་དཀོན་པོ་ཆགས་ཡོད་འདུག དེ་སྔ་ཡིན་ན་སྤྲི་དཀར་P2X7R མཐོན་པོ་ཡོད་པ་དེ་ནི་མཁལ་མ་སྐྱོ་བོ་དང་མཁལ་མའི་ཕུང་གྲུབ་ལ་རྨ་ཁ་རྒྱས་ཡོད་པ་དང་འབྲེལ་ཡོད་པ་ཙམ་ཞིག་བཤད་ཡོད།

ཚན་རིག་པས་འགྲོ་བཞིན་པའི་ཉམས་ཞིབ་བརྒྱུད་ནས་སྤྲི་དཀར་P2X7Rའདི་སྐྱེད་བྱེད་ཀྱི་རིགས་རྫས་མེད་པའི་བྱི་བའི་གཟུགས་ཕུང་ནང་གཅིན་སྙིའི་ན་ཚའི་རྐྱེན་གྱིས་ཆགས་པའི་མཁལ་མའི་རྨ་ཁ་འཕེལ་གྱི་མེད་པར་རྟོགས་ཤིང་། གཅིན་སྙིའི་ན་ཚའི་རྐྱེན་ལས་མཁལ་མར་ཉམས་སྐྱོན་བྱུང་བཞིན་པ་དེ་བཀག་འགོག་ཐུབ་སྲིད་པར་བཤད་འདུག

ཉམས་ཞིབ་པ་ཚོས་ད་དུང་བྱི་བའི་མཁལ་མའི་ཁྲག་དཀར་ནང་ལ་སིམ་འཛུལ་བྱེད་མཁན་གྱི་སྤྲི་དཀར་P2X7R མང་པོ་ཞིག་བཀག་འགོག་བྱེད་ཐུབ་པའི་སྨན་ཞིག་ཀྱང་ངོ་སྤྲོད་བྱས་ཡོད་པ་མ་ཟད། དེ་འདྲའི་སྤྲི་དཀར་མང་པོ་ཞིག་མཁལ་མའི་ཁྲག་དཀར་ནང་སིམ་འཛུལ་བྱེད་པ་དེ་ནི་གཅིན་སྙི་ནད་གཞི་ཡོད་པའི་བྱི་བའི་གཅིན་སྙིའི་མཁལ་ནད་ཀྱི་ཁྱད་གཤིས་མངོན་གསལ་ཅན་ཞིག་ལ་འགྲེལ་བརྗོད་བྱས། ཚན་རིག་པ་ཚོས་འདི་ནི་ནད་གཞི་བཅོས་ཐབས་འཚོལ་ཞིབ་ཀྱི་བརྒྱུད་རིམ་ནང་མངོན་གསལ་ཅན་གྱི་ཡར་མཐོན་ཞིག་ལ་བརྩིས་ནས་དགའ་བསུ་ཞུས་ཡོད།

ལྡོག་ནས་གནོད་སྐྱོན་ཡོད་དམ།

དབྱིན་ཇིའི་སྙིང་གི་ཐེབས་རྩ་ཁང་གི་་མཁས་དབང་ རོ་བྷརཌ་་མེན་ཛྷིས་གསུངས་དོན། གཅིན་སྙིའི་མཁལ་ནད་དེ་ཁྱབ་གདལ་ཆེན་པོ་འགྲོ་བཞིན་པའི་ཚད་ལ་སླེབ་ཡོད་ཀྱང་ང་ཚོས་ད་དུང་གྲུབ་འབྲས་ལྡན་པའི་སྨན་དེས་ནད་པར་ཕན་ཐོགས་རྒྱུར་འབད་བརྩོན་བྱེད་བཞིན་ཡོད་པ་མ་ཟད་། ཉམས་ཞིབ་འདི་ནི་གཅིན་སྙི་ནད་པར་མཁལ་མར་སྐྱོན་ཆ་ཇི་འབྱུང་སྐོར་གོ་རྟོགས་ལེན་རྒྱུར་མདུན་སྐྱོད་ཆེན་པོ་ཞིག་ཡིན་པ་དང་། ང་ཚོས་དེ་ལ་བཅོས་ཐབས་ཤིག་མགྱོགས་པོར་རྙེད་རྒྱུ་དམིགས་སུ་བཟུང་ནས་འབད་བརྩོན་བྱེད་ཀྱི་ཡོད་ཅེས་གསུངས་འདུག

ཁོང་གི་མུ་མཐུད་ནས་གསུངས་དོན། P2X7R ཞེས་པའི་སྤྲི་དཀར་བཀག་འགོག་གི་སྨན་དེ་མི་ལ་ཉེན་ཁ་མེད་པར་ཤེས་ཡོད་ཀྱང་ང་ཚོས་ད་དུང་དེས་ལོག་ནས་མཁལ་མར་གནོད་སྐྱོན་མང་བ་བྱེད་དམ་ཡང་ན་མཁལ་མར་གནོད་སྐྱོན་བྱུང་བར་སྔོན་འགོག་བྱེད་དེའི་སྐོར་ང་ཚོས་དམིགས་གསལ་གྱིས་གཏན་འབེབས་བྱས་ཉམས་ཞིབ་ཁག་ཅིག་བྱེད་འཆར་ཡོད་ལ་ད་ཐེངས་ཀྱི་ཉམས་ཞིབ་འདི་དག་ནི་ནད་གཞི་བཅོས་ཐབས་འཚོལ་བའི་ལམ་ཆེན་དུ་མདུན་བསྐྱོད་བྱེད་པར་བློ་སྤོབས་སྐྱེད་གཞི་ཞིག་ཆགས་ཡོད།

མངའ་རིས་བསྟན་འཛིན་དབང་ལྡན་གྱིས་དབྱིན་བསྒྱུར་ཞུས། 

BBC དྲྭ་ཐོག་ནས་ཡོད་པའི་སྙན་ཐོ་དངོས་མ་དབྱིན་ཡིག་ནང་ཡོད་པ་དེར་་གཟིགས་ན་འདིར་གནོན།