22:55
ཕྲ་ཕུང་གི་དབྱིབས་བཀོད་རྣམ་བཞག་སྤྱི་བཤད།
བསྟན་འཛིན་དབང་ལྡན་གྱིས་དབྱིན་བསྒྱུར་བྱས།
ཕྲ་ཕུང་རྣམས་སྐྱེ་དངོས་ཞིག་གི་ཆ་ཆུང་ཤོས་དེ་རེད། ཕྲ་ཕུང་གང་འདྲ་ཞིག་ཡིན་ན་ཡང་། ཁོང་ཚོ་ཚང་མར་ཐུན་མོང་གི་ཆ་གསུམ་རེ་ཡོད་པ་ནི། ཕྲ་ཕུང་ཚང་མར་རང་ཉིད་ཀྱི་ནང་ངོས་རྣམས་རང་གི་འཁོར་ཡུག་ལས་ལོགས་སུ་འབྱེད་པའི་ཕྱི་ཤུན་དང་། ཕིག་ཕིག་ཅན་གྱི་གཤེར་གཟུགས་ཏེ་ཕྱི་གཤེར་དང་། ཕྲ་ཕུང་སྐྱེད་སྤེལ་གྱི་རྒྱུ་ཆ་ཌི་ཨེན་ཨེ་བཅས་གསུམ་ཡོད།
ཕྲ་ཕུང་ལ་དབྱེ་བ་རྒྱ་ཆེ་ས་ནས་བཤད་ན་གཉིས་ཡོད།
དབྱེ་བ་དང་པོ་ནི། ཉིང་ལྡན་ཕྲ་ཕུང་ཡིན་པ་དང་། ཁོང་ཚོར་དབང་ཕྲ་མང་པོ་ཡོད་པ་དེའི་ནང་ལྟེ་ཉིང་ཚུད་པའི་དབང་ཕྲ་གཞན་དམིགས་གསལ་བ་ཁ་ཤས་ཡོད། ཉིང་ལྡན་ཕྲ་ཕུང་རྣམས་ཧ་ཅང་རྙོག་འཛིན་ཆེ། དེ་རྣམས་ནི་སེམས་ཅན་དང་རྩི་ཤིང་གི་རིགས་ནང་ལ་ཡོད།
དབྱེ་བ་གཉིས་པ་ནི་ཉིང་བྲལ་ཕྲ་ཕུང་ཡིན། ཁོང་ཚོར་ལྟེ་ཉིང་དང་སྐྱི་མོས་འཐུམ་པའི་དབང་ཕྲ་རྣམས་མེད། ཁོང་ཚོར་ཕྲ་ཕུང་སྐྱེད་སྤེལ་གྱི་རྒྱུ་ཆ་ཡོད་ཀྱང་དེ་ནི་ལྟེ་ཉིང་གི་སྣོད་ནང་མེད། ཉིང་བྲལ་ཕྲ་ཕུང་རྣམས་ནི་ནམ་ཡང་ཕྲ་ཕུང་རྐྱང་ལྡན་དུ་གནས་པ་ཤིང་། དེ་ཡང་ཕྲ་སྲིན་འཚུད་པའི་ཕྲ་ཕུང་རྐྱང་ལྡན་གྱི་སྐྱེ་དངོས་རྣམས་རེད།
དབང་ཕྲ་རྣམས་གང་ཡིན་ནམ།
དབང་ཕྲ་ཞེ་ན་དབང་པོ་ཆུང་ཆུང་ལ་གོ། དབང་ཕྲ་རྣམས་ནི་ཕྲ་ཕུང་གི་ཆ་ཤས་ཆེད་ལས་ཅན་ཡིན་ཅིང་ཁོང་ཚོར་རང་རང་གི་བྱེད་ལས་དམིགས་གསལ་བ་རེ་ཡོད། ཕྲ་ཕུང་གི་དོ་དམ་ལྟེ་གནས་ཡིན་པའི་ལྟེ་ཉིང་ནས་མགོ་རྩོམ་སྟེ་བཤད་ན། ལྟེ་ཉིང་ནང་ཌི་ཨེན་ཨེ་འམ་ཡང་ན་རིགས་རྒྱུད་སྤེལ་བྱེད་ཀྱི་རྒྱུ་ཆ་ཉར་ཚགས་བྱས་ཡོད། ཌི་ཨེཎ་ཨེས་ཕྲ་ཕུང་གིས་གང་ཞིག་བྱེད་དགོས་མིན་དང་ཚུལ་ཇི་ལྟར་བྱེད་དགོས་མིན་སྐོར་ལ་དོ་དམ་ནན་པོ་བྱེད། ཚོས་གཟུགས་དྲུ་གུ་ནི་འཐམ་འཁྱུད་དང་ཁྱབ་འགྲེམས་ཅན་གི་ཌི་ཨེཎ་ཨེ་ཡི་གཟུགས་བཀོད་ཡིན་པ་དང་འདི་ནི་ལྟེ་ཉིང་གི་སྐྱི་མོའི་ནང་ལ་ཡོད། ནམ་ཞིག་ཕྲ་ཕུང་ཞིག་ཁ་འགེས་པར་ཕྱོགས་དུས། ཌི་ཨེཎ་ཨེ་ནི་རིགས་རྫས་ཚོགས་ཕུང་ཞེས་པའི་གཟུགས་སུ་བཙིར་ནས་གནས་ཀྱི་ཡོད།
ལྟེ་སྣིང་ནང་ད་དུང་ལྟེ་ཉིང་ཕྲ་གཟུགས་ཡང་ཡོད། དེ་ནི་རེ་བོ་ཕྲ་གཟུགས་བཟོ་གནས་དེ་ཡིན། རེ་བོ་ཕྲ་གཟུགས་ལྟེ་ཉིང་ནས་ཐོན་པ་དང་ཁོང་ཚོར་དམིགས་གསལ་གྱི་བྱ་བ་ཞིག་ཡོད་པ་ནི་སྤྲི་དཀར་བཟོ་རྒྱུ་དེ་རེད། ལྟེ་ཉིང་ཕྱི་ལོགས་དེར་རེ་བོ་ཕྲ་གཟུགས་དང་དབང་ཕྲ་ལྷག་མ་གཞན་ཚང་མ་གཤེར་ཁུ་ཉག་ཉག་འདྲ་བའི་ཕྱི་གཤེར་ནང་ལྡིང་བཞིན་གནས་ཡོད། རེ་བོ་ཕྲ་གཟུགས་རྣམས་ནི་ཕྱི་གཤེར་ནང་རང་འགར་འགྲོ་འོང་ཆོག་པའམ་ཡང་ན་གཤེར་ནང་དྲ་ཚོགས་ངོས་འབྱར་སྡད་ཀྱི་ཡོད། གཤེར་ནང་དྲ་ཚོགས་ལ་སྐབས་རེ་ཚིག་བསྡུས་ཀྱིས་ER ཞེས་བྲི། གཤེར་ནང་དྲ་ཚོགས་རིགས་གཉིས་ཡོད། གཤེར་ནང་དྲ་ཚོགས་རྩུབ་པོ་ལ་རེ་བོ་ཕྲ་གཟུགས་སྦྱར་ཡོད་པ་དང་། གཤེར་ནང་དྲ་ཚོགས་འཇམ་པོ་ལ་རེ་བོ་ཕྲ་གཟུགས་སྦྱར་མེད། གཤེར་ནང་དྲ་ཚོགས་ནི་རེ་བོ་ཕྲ་གཟུགས་ཀྱིས་བཟོས་པའི་སྤྲི་དཀར་ལྟ་བུའི་རྫས་ཆ་འོར་འདྲེན་བྱེད་སའི་སྐྱི་མོས་འཐུམ་པའི་འགྲོད་ལམ་ཞིག་ཡིན། སྤྲི་དཀར་དང་རྫས་ཆ་གཞན་རྣམས་གཤེར་ནང་དྲ་ཚོགས་རྒྱུད་ལྒང་བུའམ་གཤེར་ཝུ་ཆུང་ཆུང་ནང་ཐོན་འགྲོ་བ་ཡིན། དེ་ཚོ་སྒོལ་གཟུགས་སམ་སྐབས་རེ་སྒོལ་ཇི་ཕུང་པོ་བརྗོད་པ་དེས་ལེན་གྱི་ཡོད།
སྤྲི་དཀར་རྣམས་སྒོལ་གཟུགས་རྒྱུད་ནས་འགྲོ་དུས་དེ་རྣམས་ཕྲ་ཕུང་གིས་སྤྱོད་ཐུབ་པའི་གཟུགས་སུ་བསྒྱུར་གྱི་ཡོད། དེ་ནི་སྒོལ་གཟུགས་ཀྱིས་དེ་རྣམས་དཀྲིས་སྐོར་བྱས་ནས་སྤྱོད་ཆོག་པའི་དབྱིབས་སུ་བཀོད་པའམ་ཡང་ན་རྫས་གཞན་ཚིལ་ཞག་གམ་ཁར་སྦོ་མངར་བཅུད་ལྟ་བུ་དེ་ཐོག་སྦྱར་གྱི་ཡོད།
གཤེར་ཝུ་ནི་རྫས་ཆ་མི་འདྲ་བ་མང་པོ་ཉར་འཚག་བྱེད་པའི་ཁུག་མ་ལྟ་བུ་ཞིག་ཡིན།
རྩི་ཤིང་གི་ཕྲ་ཕུང་འདི་ཡི་སྐྱི་པགས་ཀྱི་དཀྱིལ་དེར་ཆུ་ཉར་འཚག་བྱེད།
སེམས་ཅན་གྱི་ཕྲ་ཕུང་ལ་སྐྱར་བལྟ་ཞིག་བྱེད། ཁྱེད་ཀྱིས་འདིར་འབྱེད་གཟུགས་ཞེས་པའི་དབང་ཕྲ་ཞིག་མཐོང་། འབྱེད་གཟུགས་ནི་གད་སྙིགས་བསྡུ་མཁན་ཞིག་ཡིན་ཏེ། ཕྲ་ཕུང་ནང་གི་སྐྱོན་ཆ་ཐེབས་པའམ་ཟད་ཟིན་པའི་ཆ་ཤས་རྣམས་བསྡུ། འབྱེད་གཟུགས་དེ་རྣམས་ནི་སྨིན་རྫས་ཀྱིས་ཁེངས་ཤིང་དེས་ཕྲ་ཕུང་གི་སྙིགས་རོ་རྣམས་གཏོར་གྱི་ཡོད།
ནུས་སྐྱེད་ཕྲ་གཟུགས་ནི་རྩི་ཤིང་དང་སེམས་ཅན་གྱི་ཕྲ་ཕུང་གཉིས་ཆར་ནུས་པ་སྐྲུན་མཁན་དེ་ཡིན། ཕྲ་ཕུང་གི་དབུགས་གཏོང་ལེན་ཞེས་བརྗོད་པའི་རྒྱུད་རིམ་འདི་སྐབས་སུ་ནུས་སྐྱེད་ཕྲ་གཟུགས་ཀྱིས་(ཨེམ་ཏྲི་པི་)ATP ཞེས་པའི་འདུས་རྡུས་རྣམས་སྐྲུན་གྱི་ཡོད། དེས་ཕྲ་ཕུང་གི་ལས་བྱ་ཡོངས་ལ་ནུས་པ་སྐྲུན་པ་ཡིན། ནུས་པ་མང་ལྷག་པོ་དགོས་པའི་ཕྲ་ཕུང་ཚོར་ནུས་སྐྱེད་ཕྲ་གཟུགས་མང་བ་ཡོད། དུས་མཚུངས་སུ་ཕྲ་ཕུང་གིས་ཕྲ་ཕུང་སྒྲོམ་རུས་རྒྱུད་རང་གི་དབྱིབས་བཀོད་བདག་སྐྱོང་བྱེད། ཕྲ་ཕུང་རུས་རྐང་ནང་རྩ་རྒྱུས་ཕྲ་གཟུགས་ལྟ་བུའི་སྐུད་པ་ཡོདཅིང་དེ་ཚོ་སྤྲི་དཀར་གྱིས་བསྒྲུབ་པ་ཞིག་ཡིན་པ་མ་ཟད། སྦུ་ག་ཁོག་སྟོང་ཅན་གྱི་སྦུག་ཕྲན་དྲ་ཚོགས་ཡོད།
སྐྱེ་དངོས་གཞན་དཔེར་ན་།
རྩི་ཤིང་ལྟ་བུ་དེ་རྣམས་རང་ཉིད་ཀྱིས་ཟས་སྦྱོར་བྱེད་མཁན་ཡིན། དེའི་དོན་ནི་དེ་རྣམས་ཀྱིས་ནུས་པའི་ཆེད་ཉི་འོད་ལེན་པ་དང། ཁོང་ཚོར་ལྗང་རྫས་དབང་ཕྲ་ཞེས་པའི་དབང་ཕྲ་ལྡན་པའི་ཕྲ་ཕུང་ཡོད། ལྗང་རྫས་དབང་ཕྲ་ནང་ལ་ཉི་འོད་ཟས་སྦྱོར་བྱེད། འདི་དག་ལྗང་ཁུ་ཡིན་དགོས་དོན་ནི་འདི་དག་ལ་ལྗང་རྫས་ཅན་གྱི་ཚོན་རྫས་ཡོད་པས་ཡིན། རྩི་ཤིང་གི་ཕྲ་ཕུང་ལ་ཕྲ་ཕུང་སྐྱི་མོའི་མཐའ་ན་སྲ་ཤུན་ཡོད་ལ་
དེས་རྩི་ཤིང་ཕྲ་ཕུང་ལ་སྲུང་སྐྱོབ་དང་རོགས་པ་དབྱིབས་བཀོད་བཅས་སྐྲུན་གྱི་ཡོད། སེམས་ཅན་གྱི་ཕྲ་ཕུང་ལ་ནམ་ཡང་ཕྲ་ཕུང་ཤུན་པ་མེད།
ད་དུང་ཕྲ་ཕུང་ཉུང་ཤས་ཅིག་ལ་དམིགས་གསལ་གྱི་དབྱིབས་བཀོད་མང་པོ་ཡོད། འདིར་ཁ་ཤས་ཤིག་བརྗོད་ན། མི་ནང་ལ་དཔེར་ན་དབུགས་འབྱིན་རྔུབ་མ་ལག་ལ་གཟི་མ་ཅན་གྱི་ཕྲ་ཕུང་གི་དབྱིབས་བཀོད་ཡོད་པ་དང་། འདི་རྣམས་ཤིན་ཏུ་ཕྲ་བའི་བ་སྤུ་ཡིན་ལ་རླབས་མཉམ་དུ་སྐྱོད་པ་ཡིན། བྱེད་ལས་ནི་འདིས་དབུགས་རྔུབ་སྐབས་རླུང་ནང་དུ་འདེད་པ་དང་རླུང་མཉམ་ཡོང་བའི་རྫས་རྣམས་བཀག་ཅིང་གློ་རྒྱག་སྐབས་ཕྱིར་བུད་བྱེད་ཀྱི་ཡོད། ཕྲ་ཕུང་གཞན་ཁག་ཅིག་ལ་ཡོད་པའི་དམིགས་གསལ་གྱི་དབྱིབས་བཀོད་ནི་རྟ་རྔ་ལྟ་བུའི་དབྱིབས་བཀོད་འདི་རེད།
ཕྲ་སྲིན་ཁ་ཤས་ལ་དབྱིབས་བཀོད་འདི་ཡོད་པ་དང་། ཕིལ་ཇི་ལམ་ཞེས་པ་འདི་ནི་རྔ་མ་ཆུང་ཆུང་ལྟ་བུ་ཞིག་ཡིན་པ་དེས་ཕྲ་ཕུང་དེ་རང་འགུལ་གྱིས་སྐྱོད་བཅུག་པའམ་འཕུལ་འདེད་བྱེད་ཀྱི་ཡོད། མིའི་ནང་ལ་ཕིལ་ཇི་ལམ་ཡོད་པའི་ཕྲ་ཕུང་གཅིག་རང་ཡོད་པ་ནི་ཁམས་དཀར་ཕྲ་ཕུང་རེད།
མདོར་བསྡུ་ནས་བཤད་ན། སེམས་ལ་ངེས་དགོས་པ་ཞིག་ནི།
ཉིང་ལྡན་ཕྲ་ཕུང་རྣམས་ནི་ལྟེ་ཉིང་ལྡན་ལྡན་ཅིང་སྐྱི་མོ་ཐུམས་པའི་རྩི་ཤིང་དང་སེམས་ཅན་གྱི་ཕྲ་ཕུང་ཁག་རེད།
དེ་བཞིན་ཉིང་བྲལ་ཕྲ་ཕུང་ནི་ཁྱད་ཆོས་འདི་དག་མ་ཚང་བའི་ཕྲ་ཕུང་རྐྱང་ལྡན་ཁག་རེད།
ཕྲ་ཕུང་ཚང་མར་ཕྲ་ཕུང་སྐྱི་མོ་དང་ཕྱི་གཤེར་རིགས་རྫས་སྐྱེད་སྤེལ་གྱི་རྒྱུ་ཆ་ཡོད།
རྩི་ཤིང་གི་ཕྲ་ཕུང་ཁོ་ན་ལ་མ་གཏོགས་ལྗང་རྫས་དབང་ཕྲ་མེད་ན་ཡང་།
རྩི་ཤིང་དང་སེམས་ཅན་གྱི་ཕྲ་ཕུང་གཉིས་ཆར་ནུས་སྐྱེད་ཕྲ་གཟུགས་ཡོད།
No comments
Post a Comment